𝑵𝑨𝑵𝑨𝑶 𝑨𝑻𝑹𝑰𝑲𝑨𝑺𝑨 𝑴𝑰𝑶𝑴𝑷𝑨𝑵𝑨 𝑨𝑴𝑰𝑵’𝑰𝒁𝑨𝑵𝒀 𝑻𝑬𝑻𝑶 𝑨𝑴𝑩𝑰𝑳𝑶𝑩𝑬 𝑵𝒀 𝑪𝑷𝑮𝑼

Ny datin’ny 13 oktobra no natokan’ny fivoriamben’ny Firenena Mikambana hankalazana maneran-tany ny andro iraisampirenena amin’ny fampihenana ny tandindondoza na ny JIRRC « Journée Internationale de la Réduction des Risques de Catastrophes ». Ho an’i Madagasikara, dia eto amin’ny Distrikan’Ambilobe, Faritr’i Diana no hanaovana ny hetsika mifandraika amin’izany fankalazana izany, ao anatin’ny lohahevitra hoe : « Ny lanjan’ny fanabeazana amin’ny fiarovana sy fampaefana ny tanora mba ho fametrahana hoavy mahatsangy kokoa ».

Nisy ny atrikasa notarihin’ny CPGU na ny « Cellule de Prévention et d’appui à la Gestion des Urgences » mirafitra eo anivon’ny Fiadidina ny Primatiora taty an-toerana androany, nibanjinana ny lohahevitra hoe : « Ny fahaiza-miatrika sy miarina irery mifototra amin’ny natiora ». Nandray anjara mavitrika ireo rantsamangaika rehetra voakasik’izany ety ifotony, ary nizara ny traikefany avy, amin’ny fampiasana ireo teknika rehetra heverina hitondra fahombiazana amin’ny fikajiana ny natiora. Tanjon’izao hetsika izao, ny hanaovan’ny rehetra fiomanana hiatrika ny tandindondoza ao anatin’ny fotoam-pahavaratra, ankoatra ireo paikady mialoha efa apetraky ny fitondram-panjakana, hanalefahana araka izay azo atao ireo ambana ara-toetrandro mandindona ny Planeta misy antsika.