Tanteraka androany atoandro teto amin’ny Lapam-panjakana Mahazoarivo ny dinikasa teo amin’ny Praiminisitra, Lehiben’ny Governemanta Ntsay Christian sy ireo Lehiben’ny Fileovana manerana ny Faritra rehetra eto Madagasikara, notarihin’ny Minisitry ny Atitany, Ramatoa Rahajavololoniaina Niritsoa Harinandrasana.

Teboka telo lehibe no nifanakalozana, ka voalohany tamin’izany ireo fanamby arak’asa miandry mandritra ity taona 2025 ity, mba hihatsara sy hitoetra hatrany ny filaminana sy ny fandriampahalemana manerana ny Nosy. Voasongadina izany nandritra ny tombana sy ny jery todika natao mikasika ny asa sy ny vokatra azo tamin’iny taona 2024 lasa teo iny. Ny faharoa, dia ny fandrindrana bebe kokoa ny asam-panjakana mba hisian’ny tontolom-pampandrosoana miabo, hanamora ny fanatanterahana ny Politika Ankapoben’ny Fanjakana, izay tarihin’Andriamatoa Filohan’ny Repoblika Andry Rajoelina. Ary ny fahatelo, dia ny fametrahana ny fahamarinan-toerana isam-paritra, ka mba ho tena Taonan’ny Asa sy Filaminana tokoa ity 2025 ity.

Nisy ireo tatitra nataon’ireto Lehiben’ny Fileovana ireto, ka nanomezan’ny Praiministra toromarika maro samihafa hampajariana hatrany ny asam-panjakana any amin’ny Faritra rehetra maneran’ny Nosy. Nifampirary soa ihany koa moa ny roa tonta nandritra ity fihaonana ity.